尋日升到 28000 幾點，睇到我眼定定，令我諗起響酒吧好多既對話
"有無好 男仔/女仔 介紹俾我呀？"
"香港無好 男仔/女仔 架啦！個個都係睇 身材/身家"
"我個 男/女 朋友點點點、乜乜乜，都唔知點解佢會咁"
我話大藍籌就個個都知好野，你又買唔買得起先？
當男既要女人樣靚身材正，女既要男人有車有樓養埋你，你又俾到乜野人地先？
買細價股又羊生羊太，但求就手好樣就買左先，男既睇身材，女既睇錢財，你話死唔死！
買公用股又話回報低，男既無新意、女既無情趣
買A股又驚，一時間跌少少就拿拿聲走貨，d 貨睇耐 d 好似會死咁。男人女人都有低潮時間，你走左去仲話男既無錢食軟飯，女既就洗男人錢大花筒，咁人地成功之後升到吧吧聲咪響度嗌笨囉
所以我成日話做人要知足，個個升完一個價位又想升第二個價位，咁你都要知自己想要個價係乜先得架
兩個人過人世唔係你話我唔好、你話我唔好，咁點過日子呀？
男係一隻筷子，女係一隻筷子。一隻又唔係食唔到飯既，不過兩隻先可以好好地咁食架嘛。有問題我幫下你，你幫下我，就一世架啦
唔知大家知唔知，李安導演家下點睇都係大藍籌，攞埋攞埋咁多獎，錢唔好講啦，最少都為華人增光啦。
原來之前有六年係佢老婆擔起成頭家，佢先有今日。希望李導演佢生生性性，唔係 d 人又話男人無良心，拋棄糟糠之妻。
不過講返轉頭：有無好股票介紹俾我呀？重要就係回報高風險低入門平就最好啦！
